Lebuh ‘Bepilihbesai’ Berubah Nyadi Keruga Besai - KOMEN

Ba minggu ti penudi tu bala tuai dalam BN ari serata menua Malaysia dipeda chakah bendar nguna bemacham-macham taktik enggau chara dikena sida ngulihka pemenang dalam bepilihbesai DUN di Sarawak, ngena chara nyuap bala pengundi, ngemba sereta nipu bala pengundi sida terang-terang.

Dalam kandang sehari-dua tu agi (baka ti ngelama tu) BN deka bejalaika pengawa selama sida meda ‘pemenang’ udah bekau sida ngayanka cherita kelulu bepilihbesai sida.

Nadai kemata ke meruan, ti endang, nadai betoleransi – bala tuai piak PR ti udah dikemendarka tama menua Sarawak deka ditangkap lalu diburu ari menua nya kena 5hb Mei. Nadai ketegal deka diberi ke sida.

Beratus ribu iti undi nengah pos ari bala polis enggau soldadu ari menua Malaya udah diagih-agihka dikena nyeruri ni bagi kerusi BN ti enda tentu tegap – beduduk ba penambah 11 iti kerusi baru ti mit-mit ke pelilih menua pesisir, endang dikarapka tau nyukupka majority 2/3.

Udah nya raban kleptokrat tu deka mansutka jaku tanda pengaga ati ba bala sida empu lalu ulih ngumbai diri endang dikerinduka rayat, sebedau sida beguai-guai nangga aji ke menua Mekah ngambika endur sida meresi dosa diri.

Bepilihbesai ti nadai bekaul enggau Najib? Adenan dipeda nyembah Najib

Bepilihbesai ti nadai bekaul enggau Najib? Adenan dipeda nyembah Najib

Ba mata dunya, semua nya enda beresi. Pengawa bepilihbesai patut dichereminka ba pemujur ngenataika jaku sangkal enggau talat, lalu ukai beduduk ba ulah beduan rayat.
Bala pemerati ulih meda BN ngembuan ulah ti baka nya laban sida empu nemu lalu takut enti sida bemain ba tanah ti rata. Sida ngaku udah lenyau sukung ari rayat, nya kebuah sida ngena chara kasar dalam pengawa bepilihbesai tu.

Najib udah bebendar dipeda mejal Istana besetuju enggau iya ngulihka ‘kuasa besai’ pemerintah, baka ti udah disetujuka bala bakih iya dalam BN di rumah parlimen dikena iya nyaga diri ari kena dawa ketegal ngenchuri bebillion-billion dollar ulih bala pemansik entarabansa.

Sekeda ari chara sekat ti udah dipejalaika Najib nya ba atur nguna media social, awakka parti iya ba bepilihbesai DUN di Sarawak enda ulih ayan ba panggau internet dunya.
Lebuh iya baru mangku pengawa PM dalam taun 2009 Najib udah ngaga ‘ubah’ dikena iya ngapurka sistem ti kasar dikena iya nentuka raban kleptokrat BN seruran ba endur sida bekuasa, lalu nyadi semakin kaya.

Adenan Satem mega mai ubah baka Najib sereta iya mangku pengawa Kepala Menteri di Sarawak.

Sama baka Adenan Satem, Najib Razak udah mujur ngengkahka diri empu ba tengah-tengah penyalah Makai suap ti majak ngamahka pengidup enggau pejalai pengawa politik iya. Lebuh seduai iya sama ngeluluka diri merening ke mua, ubah ti bendar nya patut dikena nukar perintah lalu madamka cara perintah kleptokrat ke UMNO enggau sida kroni nya sebilik di menua Malaysia.

Pengawa bepilihbesai 2011 di Sarawak nyadika luching pengerak ke terubah.Media nengah internet ti lepas endang besai bendar guna, kelimpah ari Anwar Ibrahim ti angkat nyadika tuai raban penyakal, ti ngujungka BN majak tendu.

Enti sema BN enda nguasa kerusi ti renchit-renchit di menua pesisir, Kepala Menteri ke dulu suba, Abdul Taib Mahmud tentu lama udah tumbang.

Najib, maya nya mega benung napi jaku kutuk enggau bantah bala orang ti dulu ari iya, ti ngujungka iya nembuka pengawa bepilihbesai enggau chara nipu awakka menang ba taun 2013.

Ari nya iya udah nipu ngena duit ti dicuri iya ari wang turu ti ditumbuhka iya empu, 1MDB.

Najib udah mujur nipu ba bepilihbesai 2013 nyin kemari – alu semina menang mudah aja. Udah nya iya lalu nepu Anwar Ibrahim ke dalam rumah pasung nyentuk ke sehari tu.
Najib ti mai ubah udah belajar ari ulah enggau pengawa iya empu ba taun nyin kemari, ti endur penyalah iya ba atas 1MDB udah majak dibantaika lalu ditemu orang mayuh, terima kasih ke fenomena media internet, ti jauh pechuma ari suratberita enggau chara penerang ti bukai.

Udah nya Najib berubah ari orang ti mai ubah nyadi siku dictator ti ganas, dipeda bebendar amat ngetanka penuduk iya.

Tambah mega, enti iya puntan, iya nemu kuasa undang-undang deka dikena ngelaban iya … enda nyengkaum sekeda penyalah iya ti dulu suba ti tau dikena mantah pemujur iya ngulihka penuduk Menteri Besai.

Nadai siku orang deka gaga sereta lantang ati ke atur bepilihbesai di Sarawak. Isu ti pemadu besai nya nama patut dikereja rayat Malaysia ba Najib Razak enggau BN ti diuluka iya?

Sign-up to receive regular updates from Sarawak Report

We send out the latest story at 7am Malaysia time

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments